UrduLead UrduLead
Related Articles
ان لینڈ ریونیو سروس کے 50 سے زائد سینئر افسران کے تبادلے و تقرریاں
وفاقی حکومت نے فیڈرل بورڈ آف ریونیو (ایف بی آر) کی ان لینڈ ریونیو سروس (IRS) میں بڑے پیمانے پر انتظامی ردوبدل کرتے ہوئے گریڈ 19 سے گریڈ 22 تک کے 50 سے زائد سینئر افسران کے تبادلوں اور تقرریوں کا نوٹیفکیشن جاری کر دیا ہے۔
ریونیو ڈویژن کی جانب سے جاری نوٹیفکیشن کے مطابق یہ تبادلے اور تقرریاں فوری طور پر نافذ العمل ہوں گی اور آئندہ احکامات تک برقرار رہیں گی۔ انتظامی تبدیلیوں میں ایف بی آر ہیڈکوارٹرز، ریجنل ٹیکس دفاتر (RTOs)، لارج ٹیکس پیئرز آفسز (LTOs)، کارپوریٹ ٹیکس آفسز (CTOs) اور مختلف خصوصی ڈائریکٹوریٹس کے اہم عہدے شامل ہیں۔
نوٹیفکیشن کے مطابق گریڈ 22 کی افسر سعدیہ صدف گیلانی کو چیف کمشنر، کارپوریٹ ٹیکس آفس لاہور کے عہدے سے تبدیل کر کے ممبر، فیڈرل بورڈ آف ریونیو ہیڈکوارٹرز اسلام آباد تعینات کر دیا گیا ہے۔
اسی طرح گریڈ 22 کی افسر تہمینہ عامر کو ڈائریکٹر جنرل، ان لینڈ ریونیو سروس اکیڈمی لاہور مقرر کیا گیا ہے۔ وہ 6 اگست 2026 کو سید ندیم حسین رضوی کی ریٹائرمنٹ کے بعد اپنے عہدے کا چارج سنبھالیں گی۔
گریڈ 21 کی افسر آمنہ حسن کو چیف کمشنر، ریجنل ٹیکس آفس راولپنڈی سے تبدیل کرکے ڈائریکٹر جنرل، ڈائریکٹوریٹ جنرل آف اینٹی بے نامی انیشی ایٹو، اسلام آباد تعینات کیا گیا ہے، تاہم ان کی تعیناتی لاہور اسٹیشن پر ہوگی۔
اسی طرح گریڈ 21 کی افسر نبیلہ فرحان بیگ کو چیف کمشنر، کارپوریٹ ٹیکس آفس اسلام آباد مقرر کر دیا گیا ہے۔
نوٹیفکیشن کے تحت لاہور، کراچی، اسلام آباد، راولپنڈی، ملتان، حیدرآباد اور سرگودھا سمیت ملک کے مختلف شہروں میں تعینات متعدد چیف کمشنرز، ڈائریکٹر جنرلز، کمشنرز اور دیگر سینئر افسران کے بھی تبادلے کیے گئے ہیں۔ بعض افسران کو نئی ذمہ داریوں کے ساتھ اضافی چارج بھی سونپا گیا ہے تاکہ انتظامی امور میں تسلسل برقرار رکھا جا سکے۔
یہ وسیع پیمانے پر ہونے والا ردوبدل ایف بی آر ہیڈکوارٹرز کے علاوہ انٹرنل آڈٹ، براڈننگ آف ٹیکس بیس (BTB)، انفارمیشن ٹیکنالوجی اینڈ ڈیجیٹل ٹرانسفارمیشن (IT&DT)، لیگل ونگ اور دیگر خصوصی شعبوں تک بھی پھیلا ہوا ہے۔
ایف بی آر نے تمام تبادلہ شدہ افسران کو ہدایت کی ہے کہ وہ فوری طور پر اپنے عہدوں کا چارج چھوڑنے اور سنبھالنے کی رپورٹس بورڈ کو ارسال کریں تاکہ سرکاری ریکارڈ مکمل کیا جا سکے۔
نوٹیفکیشن میں واضح کیا گیا ہے کہ جن افسران کو کارکردگی الاؤنس (Performance Allowance) حاصل ہے، وہ اپنی نئی تعیناتی کے مقام پر بھی مقررہ قواعد و ضوابط کے مطابق یہ الاؤنس وصول کرتے رہیں گے۔
ذرائع کے مطابق ایف بی آر میں یہ بڑے پیمانے کی انتظامی تبدیلیاں ٹیکس انتظامیہ کو مزید مؤثر بنانے، محصولات کی وصولی بہتر کرنے اور مختلف ٹیکس دفاتر میں نئی انتظامی قیادت متعارف کرانے کی حکومتی کوششوں کا حصہ ہیں۔
