UrduLead UrduLead
Related Articles
مقبول ڈرامہ کفیل جو Big Bang Entertainment کی پیشکش ہے اور ARY Digital پر نشر ہو رہا ہے، اپنی منفرد کہانی کے باعث ابتدا میں خوب سراہا گیا۔ ڈرامے کی کہانی معروف رائٹر عمیرہ احمد نے تحریر کی ہے جبکہ ہدایت کاری میثم نقوی نے دی ہے۔
تاہم ڈرامے میں 20 سالہ ٹائم جمپ کے بعد پیش کی جانے والی کہانی پر شدید تنقید سامنے آئی ہے۔ ناظرین کی بڑی تعداد کا کہنا ہے کہ نوجوان کاسٹ نے کہانی کو کمزور کر دیا جبکہ متعدد نوعمر رومانوی کہانیوں کو بھی غیر ضروری قرار دیا گیا۔
اس تنقید کے بعد عمیرہ احمد نے سوشل میڈیا پلیٹ فارم X (سابقہ ٹوئٹر) پر اپنا مؤقف پیش کیا۔ انہوں نے انکشاف کیا کہ اصل اسکرپٹ میں ٹائم لیپس 27 سال کا تھا، جس میں مرکزی کردار سبُک کی عمر 26 سال، جویریہ کی 25 سال جبکہ سب سے چھوٹی تانیا کی عمر 18 سال رکھی گئی تھی۔
Original time lapse in the script of #Kafeel was 27 years, Subuk was 26 years old, Juveria 25 years old when she got married and youngest Tania was 18 years old.
— Umera Ahmed (@UmeraAhmedOffic) April 17, 2026
Due to casting they changed the time lapse due to which many ppl feel its showing young kids getting married.
انہوں نے مزید لکھا کہ کاسٹنگ کی وجہ سے ٹائم لیپس کو کم کر دیا گیا، جس کے باعث ناظرین کو ایسا محسوس ہو رہا ہے کہ کم عمر کرداروں کی شادیاں دکھائی جا رہی ہیں۔ انہوں نے بالواسطہ طور پر زیبا اور جامی کے بچوں کی کاسٹنگ پر بھی عدم اطمینان کا اظہار کیا۔
دوسری جانب مداح اب بھی مطمئن نہیں۔ کئی صارفین نے سوال اٹھایا کہ 18 سے 25 سال کے کرداروں کی شادیوں کو مرکزی موضوع بنانا مایوس کن ہے۔ ایک صارف نے لکھا، “ہمیں آپ سے اس سے زیادہ توقع تھی، صرف شادیوں پر مبنی کہانی نہیں۔” جبکہ دیگر نے نشاندہی کی کہ ڈرامے میں خواتین کو خودمختار دکھانے کے بجائے خاندان کا انحصار ایک نوجوان مرد کردار، سبُک، پر دکھایا گیا ہے۔
کچھ ناقدین نے ہدایتکار میثم نقوی کو بھی تنقید کا نشانہ بنایا اور کہا کہ انہوں نے ڈرامے میں غیر ضروری طور پر Gen-Z انداز شامل کیا۔ تاہم سوشل میڈیا پر ایک بڑی تعداد عمیرہ احمد کے مؤقف کی حمایت بھی کر رہی ہے اور کاسٹنگ کے فیصلوں کو اصل مسئلہ قرار دے رہی ہے۔
یہ تنازع اس بات کی نشاندہی کرتا ہے کہ ناظرین اب نہ صرف کہانی بلکہ کرداروں کی عمر، سماجی پیغام اور پیشکش کے انداز پر بھی گہری نظر رکھتے ہیں۔
