فیڈرل بورڈ آف ریونیو (ایف بی آر) نے نان فائلرز اور تاخیر سے انکم ٹیکس گوشوارے جمع کرانے والے افراد کو 25 ہزار روپے سرچارج ادا کیے بغیر ایکٹو ٹیکس پیئرز لسٹ (ATL) میں شامل ہونے کی سہولت دے دی ہے، تاہم اس کے لیے انہیں آئندہ چھ ماہ تک کوئی جائیداد خریدنے یا اس کی ملکیت حاصل نہ کرنے کی تحریری یقین دہانی کرانا ہوگی۔
ایف بی آر کے ایس آر او 2097(I)/2026 کے ذریعے انکم ٹیکس رولز 2022 میں ترمیم کرتے ہوئے نیا انڈرٹیکنگ فارم ATL-U متعارف کرا دیا ہے۔ اس سے قبل اس اسکیم کا ابتدائی مسودہ 6 اکتوبر 2026 کو ایس آر او 1619(I)/2026 کے تحت جاری کیا گیا تھا۔
نئے طریقہ کار کے تحت وہ افراد جو مقررہ تاریخ یا توسیع شدہ آخری تاریخ گزرنے کے بعد تازہ ترین ٹیکس مدت کا انکم ٹیکس ریٹرن جمع کرائیں گے، وہ فارم ATL-U کے ذریعے چھ ماہ تک جائیداد نہ خریدنے کی یقین دہانی کرا کر 25 ہزار روپے سرچارج کی ادائیگی کے بغیر ایکٹو ٹیکس پیئرز لسٹ میں شامل ہو سکیں گے۔
چھ ماہ تک جائیداد خریدنے پر پابندی
ایف بی آر کے نئے فارم کے مطابق تاخیر سے ٹیکس ریٹرن جمع کرانے والے فرد کو تحریری طور پر اقرار کرنا ہوگا کہ وہ انڈرٹیکنگ جمع کرانے کی تاریخ سے آئندہ چھ ماہ تک کوئی جائیداد خریدے گا، حاصل کرے گا یا کسی بھی دوسرے طریقے سے اس کی قانونی یا حقیقی ملکیت میں حصہ دار نہیں بنے گا۔
اس سہولت سے فائدہ اٹھانے کے لیے مذکورہ شرط کی پابندی لازمی ہوگی۔ یعنی صرف انکم ٹیکس ریٹرن جمع کرانا کافی نہیں ہوگا بلکہ جائیداد سے متعلق چھ ماہ کی پابندی قبول کرنا بھی ضروری ہوگا۔
نئے قواعد کے مطابق فارم ATL-U انکم ٹیکس آرڈیننس کی دفعہ 182A کی ذیلی شق (3) کے تحت IRIS سسٹم کے ذریعے جمع کرایا جائے گا۔
IRIS سسٹم سے چھ ماہ کی مدت کا آغاز
ایف بی آر کے مطابق فارم ATL-U کامیابی سے جمع ہونے کے بعد IRIS کی جانب سے جاری کردہ الیکٹرانک رسید پر درج تاریخ سے چھ ماہ کی مدت شروع ہوگی۔
اس طرح پابندی کا آغاز کسی عمومی مقررہ تاریخ کے بجائے ہر ٹیکس دہندہ کی جانب سے انڈرٹیکنگ جمع کرانے کی تاریخ سے منسلک ہوگا۔
ایف بی آر کو اختیار ہوگا کہ وہ متعلقہ فرد کی جانب سے دی گئی یقین دہانی پر عمل درآمد کی تصدیق کرے۔ اس مقصد کے لیے ادارہ انکم ٹیکس آرڈیننس کے تحت دستیاب معلومات کے علاوہ کسی سرکاری ادارے، ایجنسی، رجسٹری، مالیاتی ادارے یا دیگر قانونی ذرائع سے حاصل کردہ ریکارڈ بھی استعمال کر سکے گا۔
خلاف ورزی پر ایکٹو ٹیکس پیئرز لسٹ سے سہولت ختم
نئے قواعد میں یہ بھی واضح کیا گیا ہے کہ اگر کسی شخص کے بارے میں معلومات سامنے آئیں کہ اس نے چھ ماہ کی پابندی کے دوران کوئی جائیداد خریدی، حاصل کی یا اس میں قانونی یا حقیقی ملکیتی مفاد حاصل کیا ہے تو ایف بی آر اسے اپنا مؤقف پیش کرنے کا موقع فراہم کرے گا۔
اگر سماعت کے بعد خلاف ورزی ثابت ہو جاتی ہے تو متعلقہ شخص کو دی گئی سرچارج سے استثنیٰ کی سہولت ختم کر دی جائے گی۔
ایسی صورت میں ایکٹو ٹیکس پیئرز لسٹ میں اس کی شمولیت کا معاملہ انکم ٹیکس رولز کے متعلقہ ذیلی قاعدے 2A کے تحت طے کیا جائے گا۔
اس طرح ایف بی آر نے تاخیر سے ٹیکس ریٹرن جمع کرانے والوں کو ایک طرف 25 ہزار روپے سرچارج سے بچنے کا راستہ فراہم کیا ہے، جبکہ دوسری جانب اس سہولت کو آئندہ چھ ماہ تک جائیداد کی خریداری نہ کرنے کی شرط سے منسلک کر دیا ہے۔
یہ اقدام ٹیکس نیٹ میں افراد کی شمولیت بڑھانے کی کوشش ہے، تاہم اس کے اثرات کا انحصار اس بات پر ہوگا کہ کتنے تاخیر سے گوشوارے جمع کرانے والے افراد جائیداد کی خریداری سے متعلق چھ ماہ کی پابندی قبول کرتے ہیں۔
