UrduLead UrduLead
Related Articles
اداکار و ٹی وی میزبان فہد مصطفیٰ کی جانب سے اپنے گیم شو میں حال ہی میں رشتہ ازدواج میں بندھنے والے گوہر رشید اور کبریٰ خان سے اگلے سال اولاد کی فرمائش کی ویڈیو وائرل ہوگئی۔
گوہر رشید اور کبریٰ خان شادی کے بعد پہلی بار حال ہی میں دونوں فہد مصطفیٰ کے گیم شو ’جیتو پاکستان‘ میں شریک ہوئے۔
دونوں اداکار گزشتہ ماہ فروری میں رشتہ ازدواج میں بندھے تھے اور شادی کے ایک ماہ بعد انہوں نے گیم شو میں ایک ساتھ شرکت کی۔
دونوں اداکار شادی سے قبل بھی اسی گیم شو میں شرکت کرتے رہے ہیں اور اُن سے اسی گیم شو میں پہلے شادی سے متعلق بھی پوچھا جاتا رہا ہے۔
حال ہی میں دونوں اداکاروں نے گیم شو میں شرکت کی تو فہد مصطفیٰ نے ایک سیگمنٹ کے دوران اُن سے مزاحیہ انداز میں آئندہ سال اولاد کی فرمائش کی۔
گیم شو کے ایک سیگمنٹ کے دوران فہد مصطفیٰ نے کبریٰ خان کو مخاطب ہوتے ہوئے کہا کہ ’ان کے شوہر گوہر رشید کو ابھی سے بچوں کا شوق ہو چلا ہے‘۔
فہد مصطفیٰ نے بات کو جاری رکھتے ہوئے گوہر رشید کی جانب دیکھا اور کہا کہ ’انشاء اللہ اگلے سال ہم خوشخبری سنیں گے‘۔
میزبان کی فرمائش اور خواہش پر گوہر رشید نے بھی مسکراتے ہوئے جواب دیا کہ انشاء اللہ۔
براہ راست گیم شو میں فہد مصطفیٰ کی جانب سے کبریٰ خان اور گوہر رشید سے ایک سال کے اندر اولاد کی فرمائش کی ویڈیو وائرل ہوگئی اور صارفین نے اس پر دلچسپ تبصرے بھی کیے۔
فہد مصطفیٰ کی فرمائش پر کبریٰ خان نے شرماتے ہوئے پریشان نظر آنے کی اداکاری بھی کی، تاہم وہ ان کی بات پر مسکراتی رہیں۔
فہد مصطفیٰ کی جانب سے نوبیاہتے جوڑے سے ایک سال کے اندر اولاد کی فرمائش پر سوشل میڈیا صارفین نے انہیں آڑے ہاتھوں لیا اور ساتھ ہی پروگرام کو بھی تنقید کا نشانہ بنایا۔
