UrduLead UrduLead
Related Articles
قومی ٹیم کے اسپنر ساجد خان نے کہا ہے کہ ویسٹ انڈیز کے خلاف دوسرا ٹیسٹ میچ جیتنے کی ہر ممکن کوشش کریں گے، کرکٹ میں کچھ بھی ناممکن نہیں ہوتا۔
پاکستان اور ویسٹ انڈیز کے درمیان دوسرے ٹیسٹ میچ کے دوسرے دن کے اختتام پر ملتان کرکٹ اسٹیڈیم میں پریس کانفرنس کے دوران ساجد خان کا کہنا تھا کہ اس وقت سعود شکیل کریز پر موجود ہیں وہ پہلے بھی اچھی اننگز کھیل چکے ہیں۔
انہوں نے کہا کہ سعود شکیل کے بعد محمد رضوان اور سلمان علی آغا نے بھی بیٹنگ کے لیے آنا ہے، ہمیں امید ہے کہ یہ لوگ اچھی بیٹنگ کا مظاہرہ کریں گے اور ایک اچھی اننگز کھیل کر ٹیم کو میچ جتوائیں گے۔
پچ سے متعلق پوچھے گئے سوال کے جواب میں ساجد خان نے کہا کہ اس پچ پر بیٹنگ کرنا آسان نہیں ہے، یہ بہت مشکل پچ ہے لیکن جب گیند تھوڑا پرانا ہوجاتا ہے تو زیادہ ٹرن نہیں ہوتا اور بلےبازوں کے لیے پچ تھوڑی آسان ہوجاتی ہے۔
ان کا کہنا تھا کہ اب ماضی والی کرکٹ نہیں کھیلی جارہی بلکہ یہ ماڈرن کرکٹ ہے جہاں ٹیل اینڈر بھی اچھی بیٹنگ کرلیتے ہیں، ہم بھی پوری کوشش کریں گے اور میچ میں ابھی کچھ بھی ناممکن نہیں ہے۔
بابر اعظم سے متعلق پوچھے گئے سوال پر انہوں نے کہا کہ کوئی بھی کھلاڑی جان بوجھ کر اپنی وکٹ نہیں گنواتا، بدقسمتی سے بابر اعظم دوسرے دن کے اختتام سے کچھ اوور پہلے آؤٹ ہوگئے تاہم وہ ایک بہترین کھلاڑی ہیں۔
ان کا مزید کہنا تھا کہ کچھ وقت پہلے تک یہاں ٹیسٹ میچز کے نتائج نہیں آتے تھے اس لیے لوگ دیکھنے بھی نہیں آتے تھے لیکن اب ان پچز سے رزلٹ آرہا ہے، باقی جیت اور ہار تو کھیل کا حصہ ہے۔
خیال رہے کہ پاکستان اور ویسٹ انڈیز کی ٹیموں کے درمیان ملتان میں کھیلے جارہے سیریز کے دوسرے ٹیسٹ میچ کے دوران پہلے دن ہی دونوں ٹیمیں آؤٹ ہوگئیں، ایشیا کی تاریخ میں ٹیسٹ میچ میں پہلی بار ایک دن میں 20 وکٹیں گریں۔
