UrduLead UrduLead
Related Articles
وزیر تعلیم پنجاب رانا سکندر حیات کا کہنا ہے کہ گورنر پنجاب سردار سلیم حیدر جامعات میں وائس چانسلرز کی سمری مسترد نہیں کرسکتے ، ان کے پاس سمری مسترد کرنے کا اختیار نہیں۔
پنجاب کی جامعات میں مستقل وائس چانسلرز کی تعیناتی تنازعے کا شکار ہوگئی اور گورنر پنجاب سردار سلیم حیدر نے وزیراعلیٰ پنجاب مریم نواز کی سمریوں پر اعتراضات لگانے کا فیصلہ کرلیا ہے۔
معاملے پر ردعمل دیتے ہوئے وزیر تعلیم پنجاب رانا سکندرحیات نے کہا ہے کہ اگر گورنر پنجاب کوئی من پسند امیدوار کو وی سی لگانا چاہتے ہیں تو یہ نہیں ہوگا، وہ وائس چانسلرز کی سمری مسترد نہیں کرسکتے ، ان کے پاس سمری مسترد کرنے کا اختیار نہیں ۔
رانا سکندر حیات کا کہنا تھا کہ وزیراعلیٰ پنجاب کے پاس ایک نام گورنر کو بھیجنے کا اختیار ہے اور گورنر پنجاب پر لازم ہے وزیراعلیٰ پنجاب کے طے شدہ نام منظور کریں، اگر گورنر کو کوئی امیدوار پسند نہیں تو ہم کچھ نہیں کرسکتے۔
وزیر تعلیم کا کہنا تھا کہ سردار سلیم حیدر کسی ایسی بات پر مجبور نہ کریں جس سے دل آزاری ہو اور وہ تعلیم میں سیاست نہ کریں۔
ان کا کہنا تھا کہ اگر گورنر پنجاب تعلیم میں تنازعہ کھڑا کریں گے تو قانون راستہ لے گا، جن امیدواروں کو مسترد کیا انہوں نے گورنر پنجاب سے رابطے کیے، مسترد امیدواروں کی جان نکلی ہوئی ہے، طاقت،دھونس، سفارش والے افراد کو وی سی نہیں لگائیں گے ۔
انہوں نے کہا کہ گورنر پنجاب جامعات کے چانسلر ہیں، تعلیم کی بہتری کے لیے کوئی کام کرتے لیکن انہوں نے جامعات کی بہتری کے لیے تو کبھی حکومت سے رابطہ نہیں کیا، جو تعلیم کے راستے میں دیوار بنے گا، وہ دیوار گرادیں گے۔
