UrduLead UrduLead
Related Articles
چیمپینز ٹرافی کی اختتامی تقریب میں پاکستان کی عدم شمولیت سے آئی سی سی پر سوالات اٹھ گئے، میزبان ملک پاکستان کو اختتامی تقریب میں نمائندگی ہی نہ ملی۔
ذرائع نے بتایا ہے کہ پاکستان کی طرف سے ٹورنامنٹ ڈائریکٹر سمیر احمد دبئی اسٹیڈیم میں موجود تھے مگر آئی سی سی نے میزبان ملک کو نمائندگی دینے کی زحمت نہیں کی۔
بھارت سے تعلق رکھنے والے چیئرمین آئی سی سی جے شاہ، نیوزی لینڈ اور بی سی سی آئی آفیشلز کو اختتامی تقریب میں اسٹیج پر مدعو کیا گیا تاہم میزبان ملک ہونے کے باوجود کسی پاکستانی کو تقریب میں مدعو نہیں کیا گیا۔
ڈان نیوز نے کئی مرتبہ آئی سی سی ترجمان سے رابطہ کیا مگر کونسل کی جانب سے کوئی جواب نہ ملا ۔
میڈیا رپورٹس کے مطابق آئی سی سی کو آگاہ کردیا گیا تھاکہ چیئرمین پی سی بی محسن نقوی اختتامی تقریب میں دستیاب نہیں ہوں گے اور ان کی جگہ ٹورنامنٹ ڈائریکٹر سمیر احمد سید تقریب میں شرکت کریں گے۔
پی سی بی حکام اس حوالے سے باقاعدہ طور پر آئی سی سی کو خط لکھنے پر غور کررہے ہیں تاکہ میزبان بورڈ کو نظر انداز کرنے کی وجہ معلوم کی جاسکے۔
میڈیا رپورٹس کے مطابق آئی سی سی ایونٹ کی اختتامی تقریب میں اسٹیج پر کس کس کو مدعو کرنا ہے، اس کا فیصلہ آئی سی سی حکام نے کرنا ہوتا ہے۔
ماضی میں آئی سی سی ایونٹس کے اسٹیج پر میزبان ملک کی نمائندگی ہمیشہ ہوتی رہی ہے مگر حیران کن طور پر دبئی میں اس روایت کی پاسداری نہیں کی گئی جس پر پی سی بی حکام کے ساتھ کرکٹ فینز بھی آئی سی سی کے اس رویے پر سخت نالاں ہیں۔
