ہلدی محض کھانوں کا ذائقہ اور رنگ بڑھانے والا مصالحہ نہیں بلکہ صدیوں سے روایتی طب میں بھی استعمال ہونے والی ایک اہم جڑی بوٹی ہے۔ جدید سائنسی تحقیق کے مطابق ہلدی میں موجود قدرتی مرکب کرکیومن (Curcumin) جسم میں سوزش کم کرنے اور خلیوں کو آکسیڈیٹو اسٹریس سے ہونے والے نقصان سے بچانے میں مددگار ثابت ہو سکتا ہے۔ تاہم ماہرین نے خبردار کیا ہے کہ ہلدی کے سپلیمنٹس کا ضرورت سے زیادہ استعمال جگر کو نقصان پہنچانے کا سبب بھی بن سکتا ہے۔

ہلدی، جسے انگریزی میں Turmeric کہا جاتا ہے، تقریباً 4 ہزار سال سے جنوبی ایشیا میں خوراک اور روایتی علاج کا حصہ رہی ہے۔ قدیم ہندوستانی متون میں اس کے استعمال کے شواہد ملتے ہیں، جبکہ آیورویدک اور روایتی چینی طب میں بھی اسے مختلف جسمانی مسائل کے لیے استعمال کیا جاتا رہا ہے۔

ہلدی کی افادیت کا بنیادی سبب اس میں موجود کرکیومن ہے، جو اسے مخصوص سنہری اور نارنجی رنگ دیتا ہے۔ یہ مرکب سوزش کم کرنے اور اینٹی آکسیڈنٹ خصوصیات رکھتا ہے۔ اینٹی آکسیڈنٹس جسم میں ایسے فری ریڈیکلز کے اثرات کم کرنے میں مدد دیتے ہیں جو خلیوں کو نقصان پہنچا سکتے ہیں اور مختلف بیماریوں سے منسلک ہوتے ہیں۔

ہلدی کے استعمال کے مختلف طریقے

ماہرین غذائیت کے مطابق ہلدی کو روزمرہ خوراک میں شامل کرنے کے کئی طریقے ہیں۔ اسے سالن، سبزیوں، جڑی بوٹیوں کی چائے، جوس اور دودھ میں استعمال کیا جا سکتا ہے۔

جنوبی ایشیا کی روایتی ترکیب ہلدی والا دودھ، جسے گولڈن ملک بھی کہا جاتا ہے، اب مغربی ممالک میں بھی مقبول ہو رہا ہے۔ اس میں دودھ کے ساتھ ہلدی، کالی مرچ اور دیگر گرم مصالحے شامل کیے جاتے ہیں۔

ماہرین کے مطابق ہلدی میں صرف کرکیومن ہی نہیں بلکہ ٹرمرونز (Turmerones) نامی قدرتی تیل بھی موجود ہوتے ہیں، جن میں سوزش اور آکسیڈیٹو اسٹریس کے خلاف ممکنہ مفید خصوصیات پائی جاتی ہیں۔

کالی مرچ کے ساتھ ہلدی کا استعمال کیوں اہم ہے؟

ہلدی کے فعال جزو کرکیومن کا ایک اہم مسئلہ یہ ہے کہ انسانی جسم اسے آسانی سے جذب نہیں کر پاتا۔ غذائیت کے ماہرین کے مطابق کالی مرچ میں موجود قدرتی مرکب پائپرین (Piperine) کرکیومن کے جذب ہونے کی صلاحیت میں نمایاں اضافہ کر سکتا ہے۔

تحقیقی حوالوں کے مطابق پائپرین کے ساتھ کرکیومن کا جذب بعض حالات میں 20 گنا تک بڑھ سکتا ہے۔ اسی وجہ سے ہلدی اور کالی مرچ کا امتزاج گولڈن ملک سمیت کئی غذائی ترکیبوں میں استعمال کیا جاتا ہے۔

ماہرین یہ بھی مشورہ دیتے ہیں کہ تازہ ہلدی استعمال کرتے وقت اسے بہت زیادہ درجہ حرارت پر بھوننے یا طویل وقت تک ابالنے سے گریز کیا جائے، کیونکہ اس سے اس کے بعض قدرتی اجزا اور اینٹی آکسیڈنٹ خصوصیات متاثر ہو سکتی ہیں۔

زیادہ ہلدی کا استعمال جگر کے لیے خطرناک

ہلدی کے فوائد کے باوجود اس کے سپلیمنٹس کا غیر ضروری یا زیادہ استعمال خطرات سے خالی نہیں۔ طبی ماہرین نے خبردار کیا ہے کہ زیادہ طاقت والے کرکیومن سپلیمنٹس بعض افراد میں جگر کو نقصان پہنچا سکتے ہیں۔

اس کے علاوہ ہلدی کی زیادہ مقدار معدے میں تیزابیت، متلی اور نظام ہاضمہ کی خرابی کا باعث بن سکتی ہے۔ بعض افراد میں الرجی یا مخصوص ادویات کے ساتھ منفی ردعمل بھی سامنے آ سکتا ہے۔

کن افراد کو ہلدی کے سپلیمنٹس سے احتیاط کرنی چاہیے؟

ماہرین کے مطابق خون پتلا کرنے والی ادویات استعمال کرنے والے افراد کو ہلدی کے سپلیمنٹس لینے سے پہلے ڈاکٹر سے مشورہ کرنا چاہیے۔ وارفرین، اسپرین اور دیگر اینٹی کوگولنٹ ادویات کے ساتھ ہلدی کا استعمال خون بہنے کے خطرے میں اضافہ کر سکتا ہے۔

ذیابیطس کے مریضوں کو بھی احتیاط کی ضرورت ہے، کیونکہ ہلدی خون میں شوگر کی سطح پر اثر انداز ہو سکتی ہے۔ اس کے علاوہ پتھری، صفراوی نالی میں رکاوٹ یا جگر کے امراض میں مبتلا افراد کے لیے ہلدی کے سپلیمنٹس مناسب نہیں ہو سکتے۔

حاملہ اور دودھ پلانے والی خواتین کو بھی ہلدی کے سپلیمنٹس استعمال کرنے سے پہلے طبی مشورہ لینا چاہیے۔ سرجری سے قبل بھی اس کے استعمال سے متعلق ڈاکٹر کی ہدایات پر عمل کرنا ضروری ہے۔

ہلدی کی مختلف اقسام

ہلدی کا تعلق ادرک کے خاندان سے ہے اور اس کا نباتاتی نام Curcuma Longa ہے۔ اس کی مختلف اقسام میں کرکیومن اور قدرتی تیل کی مقدار مختلف ہو سکتی ہے۔

غذائیت کے ماہرین کے مطابق ایلیپی (Alleppey) اور مدراس (Madras) ہلدی کی معروف اقسام ہیں۔ ایلیپی ہلدی میں کرکیومن کی مقدار تقریباً 4 فیصد جبکہ مدراس میں تقریباً 2 فیصد بتائی جاتی ہے۔

ماہرین کا بنیادی مشورہ ہے کہ ہلدی کو متوازن غذا کا حصہ بنایا جائے، لیکن اسے کسی بیماری کا یقینی علاج سمجھنے یا زیادہ مقدار میں سپلیمنٹس استعمال کرنے سے گریز کیا جائے۔ قدرتی غذاؤں کے فوائد اسی وقت بہتر انداز میں حاصل کیے جا سکتے ہیں جب ان کا استعمال مناسب مقدار اور طبی احتیاط کے ساتھ کیا جائے۔